سەرژێکرنا بەرمالەیان ل ناڤ کوردان دا کەڤنەشۆپییەک کەڤنارە و دێرینە. ئەڤ کەڤنەشۆپییا تایبەت ب سەدان ساڵانە د ناڤ کوردان دا هەیە و هەر نوها ژ بەردەوامە.
گەلۆ دەرمالە چی یە ؟
ژ چێلەک، گۆلک، بەران و میهێن کو ل دەرێ مالێ ب تایبەت تێن خوەدیکرن دا کو خورت/قەلاو ببن و پاشێ بێنە سەرژێکرن را دەرمالە تێ گۆتن. خوەدیکرنا دەرمالەیان سەرێ بهارێ دەسپێدکە. ئاژالێن پچوک یێن سێ-چار هەقی کو ژ بۆ دەرمالەیی تێن نەقاندن/هلبژاردن حەتا شەش هەیڤان ل مال ب کا، جەه، بەرویان باش تێن خوەدیکرن. ژ بۆ کو دەرمالە ب گۆشت و قەلاو بن گەلەکی باش تێن خوەدیکرن. تایبەتییا خوەدیکرنا دەرمالەیان ئەوە کو ل هندر دا تێنە خوەدیکرن. پشترە پاییزی ب هاتنە سەرمایێ را دەرمالە تێنە سەرژێکرن. پشتی سەرژێکرنێ گۆشتێ وان تێ هور کرن و پاشێ ژی ژ بۆ کو گۆشت خوینا خوە بەردە باش تێ خوێیکرن، گۆشت سێ رۆژان د ناڤا خوێی دا دمینە. پشتی سێ رۆژان گۆشت خوینا خوە بەرددە، پاشێ گۆشت باش تێتە شوشتن. پاشێ ژی گۆشت ڵ ئاگری تێتە قەلاندن. ب خوێیکرنا گۆشت مەبەست ئەوەیە کو گۆشت خەراب نەبە و هەر وەها ئەکا و تاهما گۆشتێ کەسداندی خوەشترە. گۆشتێ دیتر. پشتی قەلاندنا گۆش تەنەکەیێن قەلییێ تێن داگرتن و ژ بۆ زڤستانێ تێ هلانین.
ب هاتنا زڤستانێ را خوارنا قەلییێ دەسپێ دکە. سبەهێن سار یێن زڤستانێ دەما کو مرۆڤ د تاشتێ دا قەلییا دەرمالەیان دخوە مرۆڤ ژ تاهما وێ تێر نابە. گۆشتێ قەلی ل بەر ساڤارێ ، ل بەر رزێ/برنجێ، د ناڤا فاسولی و نۆکان دا، د خوارنێن رۆهن دا تێتە خوارن. هەر خوارنەکە کو گۆشتێ قەلییێ ددەڤیتێ ئەکاا وێ گەلەکی خۆش دبە. هەر وەها ب گۆشتێ قەلییێ کوتلک و شانبۆرەک ژی تێن چکرن. مالی شەڤێن زڤستانێ یێن سار و درێژ ب خوارنا قەلییێ گەرم دکن و دبۆرینن. د چاندا مە کوردان دا قەدرگرتنا مێهڤانا گەلەکی گرنگە، لەورا ڤەلی زڤستانان دەما هاتنە مێڤانان دەستێن مازوڤانان خورت دکە، ئانکو مازوڤان ب قەلییێ خوارنێن جور ب جور پێشکەشی مێهڤانێن خوە دکە، مێهڤان ژی ب خوارنا قەلی گەلەکی شاد دبن. هەر وەها هندەک مالبات ژ زارۆک و ناس و خزمێن خوە یێن ل بیانییێ/خەریبی را ژی قەلییێ رێدکن.
ل دەڤەرێن باکورێ کوردستانێ سەرژێکرنا دەرمالەیان بویە کەڤنەشۆپییەک و هەتا نوهە ژی بەردەوامە. هەر چەندێ ئەڤ چاندا وەک بەرێ نەما بە لێ دیسان ژی گەلێ مە وەک کەڤنەشۆپییەک هەر سال د ڤێ دەمێ دا دەرمالەیان سەرژێدکن و ڤێ کەڤنەشۆپییێ دگێژینن نفشێن نو و ب ڤێ شێوازئ چاندا خوە دەپارێزن. چێدبە کو ئەڤ چاندا کەڤنار و تایبەت ئانکو کەڤنەشۆپییا دەرمالەیان ل بەشێن دن یێن کوردستانێ نەمابە، ئان ژی چێدبە کو هەبە لێ ناڤێ وێ جودا/جهێواز بە، لێ بەلێ ل هەرێمە مێردینێ هێژ/هێشتا ئەڤ کەڤنەشۆپییا زندییە و ددۆمە.
من د ڤێ نفیسێ دە هەوڵ دا کو ڤێ چاندا کەڤنار ئانکو کەڤنەشۆپییا دەرمالەیێ بۆ وە راڤە بکەم. ڤێجا هێڤی و داخوازا من ئەوە یە کەسێن کو بخوینن سود و خێرێ ژێ ببینن.
محەمەد کوردی -مێردین
دیرۆک: ٠٢.١٢.٢٠٢٣
E